වසර 13කට ආසන්න විරාමයකින් පසු තුර්කි ගුවන් සේවය සිරියාවේ ඩැමස්කස් වෙත යළි සෘජු ගුවන් ගමන් ආරම්භ කරන බව දැනුම් දී තිබෙනවා.
ඒ පිළිබඳ නිවේදනය කරමින් එරට බලධාරීන් සඳහන් කර ඇත්තේ, ඉස්තාන්බුල් නගරයේ සිට සිරියාවේ ඩැමස්කස් දක්වා සතිපතා ගුවන් ගමන් වා‍ර තුනක් ක්‍රියාත්මක කිරීමට පියවර ගන්නා බවයි.
2011 වසරේ දී යුද ගැටුම් උත්සන්න වීමත් සමඟ ජාත්‍යන්තරව හුදෙකලා වී සිටින සිරියානු රජය සමඟ සබඳතා සාමාන්‍යකරණය කිරීම සඳහා වන කලාපීය උත්සාහයන් හමුවේ මෙම තීරණය ගෙන ඇති බව වාර්තා වේ.
තුර්කි ගුවන් සේවය අවසන් වරට සිරියාව වෙත සිය ගුවන් ගමන් දියත් කළේ 2012 වසරේ මාර්තු මස 31 වන දින වන අතර, අනතුරුව සිරියාවේ හිටපු ජනපති බෂාර් අල් අසාද් මහතා බලයෙන් පහ කිරීමෙන් පසු 2024 වසරේ දෙසැම්බර් මස 14 වන දින සිට ඩැමස්කස්හි පිහිටි සිය තානාපති කාර්යාලය යළි විවෘත කිරීමට තුර්කිය පියවර ගෙන තිබිණ.
