පසුගිය රජය විසින් විකිණීමට තීරණය කර තිබූ ජාතික පශු සම්පත් සංවර්ධන මණ්ඩලය වර්තමාන රජය විසින් කිසිදු අයුරකින් විකිණීමක් සිදු නොකරන බව කෘෂිකර්ම ,පශු සම්පත් ,ඉඩම් හා වාරිමාර්ග අමාත්‍ය කේ.ඩී. ලාල්කාන්ත මහතා පවසනවා.
අමාත්‍යවරයා මේ බව සඳහන් කළේ ජාතික පශු සම්පත් සංවර්ධන මණ්ඩලයේ නිරීක්ෂණ චාරිකාවකට එක්වෙමින්.
ජාතික පශු සම්පත් සංවර්ධන මණ්ඩලයේ වර්තමාන තත්ත්වය, ආයතනය හමුවේ ඇති අභියෝග සහ ඉදිරි සැලසුම් පිළිබඳව ද මෙහිදී දීර්ඝ ලෙස සාකච්ඡා කර තිබෙනවා.
එමෙන්ම වර්තමාන රජයේ ඉදිරි ජාතික වැඩපිළිවෙල අනුව පශු සම්පත් ක්ෂේත්‍රයේ ළඟා කරගැනීමට අපේක්ෂිත ඉලක්ක සඳහා ජාතික පශු සම්පත් සංවර්ධන මණ්ඩලයෙන් ලබා ගත හැකි දායකත්වය පිළිබඳව ද මෙහිදි සාකච්ඡා කර ඇති බවයි පැවසෙන්නේ.
ජාතික අවශ්‍යතාවයට සරිලන කිරි නිෂ්පාදනය දේශීයව නිෂ්පාදනය කිරීම වෙනුවෙන් ඉදිරි වසර 05 තුළ සැලසුම් කළ යුතු ආකාරය පිළිබඳව මෙහිදී අමාත්‍යවරයාගේ අවධානයට යොමු වි තිබෙනවා
