අයි.සී.සී ශූරයින්ගේ කුසලාන එක්දින ක්‍රිකට් තරගාවලිය පාකිස්ථානයේ පැවැත්වීම සම්බන්ධයෙන් පැන නැගී ඇති ගැටළුව ගැන අවසන් තීන්දුවක් ගැනීම සඳහා විශේෂ රැස්වීමක් අද(29) කැඳවා තිබෙනවා.

පාකිස්ථානය තුළ තරඟ කිරීමට ඉන්දියාව අකමැති වීම මීට හේතුවයි.

Online ක්‍රමවේදය හරහා පැවැත්වීමට නියමිත මෙම අයි.සී.සී රැස්වීමේදී විකල්ප 3 ක් සම්බන්ධයෙන් අවධානය යොමු කරනු ඇති.

එම විකල්ප තුන වන්නේ, තරගාවලියේ තරග රැසක් පාකිස්ථානයේ දී පවත්වා, ඉන්දියාව ක්‍රීඩා කරන තරග වෙනත් රටක දී පැවැත්වීම. සත්කාරක අයිතිය පාකිස්ථානයෙන් ඉවත් නොකර තරගාවලිය සම්පූර්ණයෙන්ම වෙනත් රටක දී පැවැත්වීම සහ ඉන්දියාවේ සහභාගීත්වයක් නොමැතිව එම තරගාවලිය පැවැත්වීමයි.

කෙසේ වෙතත්, තෙවැනි විකල්පය තෝරා ගැනීමට ඇති ඉඩකඩ ඉතා අවම මට්ටමක පවතින බවයි වාර්තා වන්නේ.

ක්‍රිකට් විචාරකයන් පෙන්වා දෙන්නේ ඉන්දියාව නොමැති වීම තරගාවලියට සෘණාත්මක බලපෑමක් එක්කරනු ඇති බවයි.

එමෙන්ම මූල්‍ය හා වාණිජමය ලෙසද දැඩි බලපෑමකට ලක්වනු ඇති බව ද පැවසෙනවා.

එක්දින ලෝක කුසලාන ක්‍රිකට් තරගාවලියට පමණක් දෙවැනි වන මෙම ශූරයන්ගේ කුසලාන ක්‍රිකට් තරගාවලිය අවසන් වරට පැවැත්වූයේ 2017 වසරේ දීයි.

ඒ අනුව දීර්ඝ නිහැඬියාවකට පසු මෙම තරගාවලිය ලබන වසරේ පෙබරවාරි 19වනදා සිට මාර්තු 9වනදා දක්වා පැවැත්වීමට සැලසුම්කර තිබෙනවා.

කණ්ඩායම් 8ක සහභාගිත්වනේ පැවැත්වෙන මෙය තරග 15කින් සමන්විතයි.

කෙසේ වෙතත් මේ සඳහා සුදුසුකම් ලබාගැනීමට ශ්‍රී ලංකාවට නොහැකි වුණා.