පසුගිය දිනවල රටින් පළා ගොස් ඇති බවට වාර්තා පළ වූ හිටපු අමාත්‍ය මනූෂ නානායක්කාර මහතා අද (10) පෙරවරුවේ සිරිකොත එක්සත් ජාතික පක්ෂ මූලස්ථානය වෙත පැමිණ සිටියා.
ඒ නව පක්ෂ මහලේකම් තලතා අතුකෝරල මහත්මියගේ වැඩභාර ගැනීමේ අවස්ථාවට එක්වීම සඳහා.
මෙහිදී මාධ්‍ය වෙත අදහස් දැක්වූ හිටපු අමාත්‍යවරයා සඳහන් කළේ තමන් රටින පළා නොගිය බවත් ,නිවාඩුවක් සදහා ටික කාලයකට රටින් බැහැරව සිටි බවයි.
රටින් පළා යාමට තරම් වරදක් තමා සිදුකර නොමැති බවද මනූෂ නානායක්කාර මහතා මෙහිදී සඳහන් කළා.
මේ වන විට රක්ෂිත බන්ධනාගාර ගතකර සිටින තමන්ගේ සහෝදරයා සම්බන්ධයෙන් මුලින්ම පැමිණිලි කළේද තමන් බවයි හිටපු අමාත්‍යාවරයා සඳහන් කළේ.
විදේශ රැකියා ලබාදෙන බවට සිදුකරන ඡාවාරම් සම්බන්ධයෙන් තමා අමාත්‍යාවරයා ලෙස කටයුතු කරන කාලසීමාව තුළ නිරන්තරයෙන් මාධ්‍ය මගින් දැනුවත් කිරීම් සිදු කළ බවත්, මේ ආකාරයෙන් මුදල් වංචා කර ඇති තවත් බොහෝ පිරිසක් සිටිය හැකි බවයි හිටපු අමාත්‍යවරයා පවසන්නේ.
අතේ ඇඟිලි පහ එක සමාන නොවන ආකාරයට සහෝදරයන්ද සමාන නොවන බවයි මනූෂ නානායක්කාර මහතා පවසන්නේ.
තමාගේ නම විකුණා මුදල් වංචා කළ බොහෝ පිරිසක් සිටින අතර සහෝදරයත් එවැනි එක් අයෙක් බවයි මෙහිදී හිටපු අමාත්‍යවරයා පෙන්වා දුන්නේ
ඒ අනුව මේ සම්බන්ධයෙන් ලැබෙන සියලු පැමිණිලි කඩිනමින් විමර්ශනය කරන ලෙසද හිටපු අමාත්‍යා මනූෂ නානායක්කාර මහතා මෙහිදි රජයෙන් ඉල්ලීමක් කළා.
