එක්සත් ජාතික පක්ෂය සහ සමගි ජන බලවේගය එකතු කිරීමේ සාකච්ඡා ලබන සතියේ සිට කඩිනම් කිරීමට තීරණය කර තිබෙන බව එක්සත් ජාතික පක්ෂයේ ජ්‍යේෂ්ඨ ප්‍රකාශකයෙක් සඳහන් කළා.
එක්සත් ජාතික පක්ෂයේ නව මහ ලේකම් ලෙස තලතා අතුකෝරල මහත්මිය වැඩ භාර ගැනීමත් සමඟ මෙම වැඩ කටයුතු ශක්තිමත්ව ඉදිරියට ගෙන යාමට යෝජනා වී ඇති බවයි පැවසෙන්නේ.
එක්සත් ජාතික පක්ෂය සහ සමගි ජන බලවේගය එක්ව ශක්තිමත් ජනතා බලවේගයක් ගොඩනැගීම සඳහා වන සාකච්ඡා එක්සත් ජාතික පක්ෂ නියෝජ්‍ය නායක රුවන් විජයවර්ධන මහතාගේ සහ තලතා අතුකෝරල මහත්මියගේ මූලිකත්වයෙන් පසුගිය මහ මැතිවරණයට පෙර සිටම ආරම්භ කෙරුණු නමුත් එම සාකච්ඡාවල අවසන් ප්‍රතිඵලයක් ලබා ගැනීමට නොහැකි වුණා.
නමුත් වර්තමානයේ ඇති වී තිබෙන සමාජ ආර්ථික අර්බුද හමුවේ ප්‍රබල දක්ෂිණාංශික කඳවුරක එකතුවක් පිළිබඳව නැගෙන යෝජනාවලට පිළිතුරක් ලබා දෙමින් පක්ෂ දෙකේ එකතුව සම්බන්ධ සාකච්ඡා නව මුහුණුවරකින් ඉදිරියට ගෙනයාමට අරඹන බවයි එක්සත් ජාතික පක්ෂයේ ජ්‍යේෂ්ඨ ප්‍රකාශකයා සඳහන් කළේ.
එම සාකච්ඡා බාධාවකින් තොරව ඉදිරියට ගෙන යාම සඳහා පක්ෂ නායක හිටපු ජනාධිපති රනිල් වික්‍රමසිංහ මහතා ද පූර්ණ නිදහස ලබා දී තිබෙන බව සඳහන්.
