දුමින්ද සිල්වාට බන්ධනාගාරයේ විශේෂ පහසුකම් ලබාදීමක් සිදු වී නොමැති බව බන්ධනාගාර මූලස්ථානය පවසනවා.
ඔහුට විශේෂ පහසුකම් ලබාදීමක් සම්බන්ධයෙන් පසුගිය කාලයේ විවිධ මාධ්‍යන් තුළින් විවේචනාත්මක පුවත් පළ වී තිබූ අතර, එම පුවත් දැඩිව ප්‍රතික්ෂේප කරන බවයි බන්ධනාගාර මූලස්ථානය ප්‍රකාශ කරන්නේ.
මේ පිළිබදව කරුණු සොයා බැලීමට මූලික විමර්ශන දෙකක් සිදු කළ අතර ස්ථාන පරික්ෂාවන් හා මූලික විමර්ශන වාර්තා අනුව අදාළ සිරකරුට වෙනම වැසිකිලියක් හෝ විශේෂ පහසුකමක් ලබා දී නොමැති බවද බන්ධනාගාර මූලස්ථානය වැඩිදුරටත් සඳහන් කළා.
දුමින්ද සිල්වා නැමැති සිරකරු බන්ධනාගාර රෝහලේ අංක 3 වාට්ටුවේ මේ වන විට නේවාසිකව ප්‍රතිකාර ලබමින් සිටින බවත්, ඔහු එහි නේවාසික ප්‍රතිකාර ලබන රැදවියන් 50කට වැඩි පිරිසක් සමඟ රඳවා සිටින බවයි පැවසෙන්නේ.
අදාළ සිරකරු බන්ධනාගාරය වෙත බාරදීමේදි ඔහුට ප්‍රතිකාර කළ විශේෂඥ වෛද්‍යවරයාගේ නිර්දේශ අනුව ශ්‍රී ජයවර්ධනපුර රෝහලේ අධ්‍යක්ෂවරයා විසින් වෛද්‍ය අධික්ෂණය යටතේ ප්‍රතිකාර කළ යුතු බව දැන්වීම මත බන්ධනාගාර වෛද්‍යනරුන්ගේ අධික්ෂණය යටතේ මේ වන විටත් රඳවා තිබෙන බවයි බන්ධනාගාර මූලස්ථානය පවසන්නේ.
තවදුරටත් මෙම සිරකරුට බන්ධනාගාර රෝහල තුළ නේවාසික ප්‍රතිකාර ලබා දිය යුතුද යන්න පිළිබදව සෞඛ්‍ය අධ්‍යක්ෂ ජනරාල්වරයාගෙන් ලිඛිතව විමසීමක් කර ඇති අතර, සිරකරු සම්බන්ධයෙන් සෞඛ්‍ය සේවා අධ්‍යක්ෂ ජනරාල්වරයා විසින් වෛද්‍ය මණ්ඩලයක් පත් කර ඇති අතර එහි තීරණ ලැබීමෙන් පසුව ඊට අදාළ ඉදිරි කටයුතු බන්ධනාගාර දෙපාර්තමේන්තුව විසින් සිදු කරනු ලබන බව සඳහන්.
