ලෝක පාපන්දු ආයතනය වන FIFA විසින් 2034 FIFA ලෝක කුසලානයේ සත්කාරක රට ලෙස සෞදි අරාබිය නිල වශයෙන් නම් කර තිබෙන බව විදෙස් මාධ්‍ය වාර්තා කරනවා.
එම ආයතනයේ සභාපති ගියානි ඉන්ෆැන්ටිනෝ විසිනුයි මෙම තීරණය ප්‍රකාශයට පත් කර ඇත්තේ.
ඒ, සාමාජික රටවල් 211ක නියෝජිතයින් ඊයේ (11) සූම් තාක්ෂණය ඔස්සේ රැස්වී සිදුකළ සාකච්ඡාවකින් අනතුරුව ගනු ලැබූ එකගතාවයන්ට අනුව බවයි කියන්නේ.
එහිදී 2030 ලෝක කුසලානයේ සම සත්කාරකයන් ලෙස මොරොක්කෝව, ස්පාඤ්ඤය සහ පෘතුගාලය ද තහවුරු කළ බවයි කියන්නේ.
මීට අමතරව FIFA ලෝක කුසලාන පාපන්දු තරඟාවලිය ආරම්භ කර 2030 වසරට වසර 100ක් සම්පූර්ණ වනවා.
ඒ අනුව තරඟාවලියේ ශත සංවත්සරය සනිටුහන් කිරීම සඳහා මොරොක්කෝව, ස්පාඤ්ඤය සහ පෘතුගාලයේ ඒකාබද්ධ යෝජනාවට අනුව 2030 මහාද්වීප තුනක් සහ රටවල් හයක් හරහා උරුගුවේ, ආර්ජන්ටිනාව සහ පැරගුවේ උත්සව පැවැත්වීමටයි තරඟ සංවිධායකයින් තීරණය කර ඇත්තේ.
2022 දී කටාර් රාජ්‍යය විසින් එය වේදිකා ගත කිරීමෙන් පසු සෞදි අරාබිය මෙම තරඟාවලියේ සත්කාරකත්වය දරන දෙවන මැද පෙරදිග රට බවට පත්වනු ඇත.
