හමුදා නීතිය පැනවීමේ කම්පනකාරී පියවර ව්‍යර්ථ කිරීමෙන් පසු දකුණු කොරියානු මන්ත්‍රීවරු ජනාධිපති යූන් සුක් යෝල්ට එරෙහිව දෝෂාභියෝගයක් ගෙන විත් තිබෙන බව විදෙස් මාධ්‍ය වාර්තා කරනවා.
අඟහරුවාදා අගභාගයේදී යුද නීතිය පැනවීමට ජනාධිපති යූන් දැරූ අසාර්ථක උත්සාහය සම්බන්ධයෙනුයි දකුණු කොරියාවේ විපක්ෂ නීති සම්පාදකයින් අද දහවල් ඔහුට දෝෂාභියෝගයක් පාර්ලිමේන්තුවේ සභාගත කර ඇත්තේ.
මෙම යෝජනාව ඡන්දයකට යාමට පෙර විවාදයට ගැනීමට අවශ්‍ය වනු ඇති අතර එය සම්මත වීමට පාර්ලිමේන්තු මන්ත්‍රීවරුන් 300 දෙනාගෙන් 200 ක් ඡන්දය ප්‍රකාශ කළ යුතු බව සඳහන්.
ඒ අනුව ඉදිරි පැය 72 තුළ, අදාළ යෝජනාව විවාදයට ගෙන ඡන්ද විමසීමක් පැවැත්වෙනු ඇතැයි එම වාර්තා පවසයි.
කෙසේ වෙතත් දකුණු කොරියාවේ අගමැති හැන් ඩක්-සූ සහ අනෙකුත් ඉහළ නිලධාරීන් හදිසි රැස්වීමක් පැවැත්වීමටද නියමිතයි.
මේ අතර දකුණු කොරියාවේ ඇතිව තිබෙනව මෙම කලබලකාරී තත්ත්වය පිළිබඳව උතුරු කොරියාව කිසිඳු ප්‍රතිචාරකය් දක්වා නොමැති අතර ඇමෙරිකාවේ ධවල මන්දිරය ද නිවේදනය නිකුත් කරමින් පැවසුවේ, දකුණු කොරියාවේ වත්මන් තත්ත්වය සමීපව නීරීක්ෂණය කරමින් සිටින බවයි.
