කොළඹ වරායේ පවතින දිගු පෝලිම් සහ ඒ සම්බන්ධයෙන් ගතයුතු විසඳුම් පිළිබඳ ජනාධිපති අනුර කුමාර දිසානායක මහතාගේ මූලිකත්වයෙන් අද (12) දිනයේ ජනාධිපති ලේකම් කාර්යාලයේ විශේෂ සාකච්ඡාවක් පැවැත්වෙන බව ප්‍රවාහන, මහාමාර්ග, වරාය හා සිවිල් ගුවන් සේවා අමාත්‍ය බිමල් රත්නායක මහතා පවසනවා.
මෙම සාකච්ඡාව සදහා මේ සම්බන්ධයෙන් පත්කළ කැබිනට් අනුකමිටුව හා වරාය කටයුතු සම්බන්ධව විවිධ පෞද්ගලික සමාගම්වලින් සැදුම්ලත් සංවිධාන 16 කට ආරාධනා කර ඇති බවයි අමාත්‍යාවරයා සඳහන් කළේ.
කොළඹ වරාය පරිශ‍්‍රයේ රේගු නිෂ්කාශන කටයුතුවල පවතින දිගු පෝලිම් සම්බන්ධයෙන් මාධ්‍ය වෙත අදහස් දක්වමින් අමාත්‍යවරයා මේ බව කියා සිටියා.
මෙහිදී මතුව ඇති ප්‍රශ්න සම්බන්ධව කෙටි කාලීන විසඳුම් පිළිබඳ සාකච්ඡා කිරීමට නියමිත බවයි අමාත්‍යාවරයා සඳහන් කළේ.
එමෙන්ම පෙබරවාරි 28 වනවිට එම ප්‍රශ්නවලින් සැලකිය යුතු ප්‍රමාණයක් විසඳීම සඳහා අවශ්‍ය ක්‍රියාමාර්ග කැබිනට් අනුකමිටුවේදී යෝජනා කර, ක්‍රියාමාර්ග පටන්ගෙන තිබෙන බවත් අමාත්‍යාවරයා පෙන්වා දෙනවා.
ඒ හේතුවෙන් ජනාධිපතිවරයාගේ ප්‍රධානත්වයෙන් පැවැත්වෙන රැස්වීම තුළීන් ඉතාමත්ම දැවෙන ප්‍රශ්නවලට සාධාරණ විසඳුම් ලබාගැනීමට හැකි වෙතැයි අමාත්‍ය බිමල් රත්නායක මහතා වැඩිදුරටත් සඳහන් කළා.
