සටන් කිරීමට අවශ්‍ය නම්, චීනය කිසි විටෙකත් පසු නොබසින නමුත් සාකච්ඡා සඳහා එකඟ වන්නේ නම්, සිය දොරටු විවෘත කිරීමට සූදානම් බව චීනය පවසනවා.
චීනය ඇමරිකාව සමග එකඟතාවකට පැමිණිය යුතු බවත්, එසේ නොවුණහොත් ඇමරිකාව සමග වෙළෙඳ ගනුදෙනු කළ නොහැකි වනු ඇති බවට ඇමරිකාව පසුගිය දා කළ අදහස් පළ කිරීමට ප්‍රතිචාර දක්වමිනුයි ඔවුන් මෙලෙස පවසා ඇත්තේ.
ඒ පිළිබඳ අදහස් දක්වමින් චීන විදේශ අමාත්‍යංශයේ ප්‍රකාශක Guo Jiakun මහතා සඳහන් කළේ, ඇමරිකාව විසින් දියත් කරන ලද තීරුබදු යුද්ධය සම්බන්ධයෙන්, චීනයේ ආකල්පය ඉතා පැහැදිලි බවයි.
එමෙන්ම ඇමරිකාවට සැබැවින්ම සංවාදය සහ සාකච්ඡා මගින් ගැටලු විසඳීමට අවශ්‍ය නම්, තර්ජනය කිරීම සහ අනිසි බල කිරීම නතර කළ යුතු බව ද ඔහු අවධාරණය කර තිබෙනවා.
සමානාත්මතාවය සහ අන්‍යෝන්‍ය ගෞරවය යන පදනම් මත, ඇමරිකාව චීනය සමග සංවාදයට පැමිණිය යුතු බවයි චීන විදේශ අමාත්‍යංශයේ ප්‍රකාශකවරයා එහිදී වැඩිදුරටත් පවසා ඇත්තේ.
