සත්කාරක දකුණු අප්‍රිකාව සමග පැවැති දෙවැනි ටෙස්ට් ක්‍රිකට් තරඟයෙන් ලකුණු 109 ක පරාජයක් අත්කර ගැනීමට ශ්‍රී ලංකා කණ්ඩායමට අද (9) සිදු වුණා.

Gqeberha හි පැවැති තරඟයේ අවසන් දිනය වූ අද දිනය ආරම්භ කරන විට ජයග්‍රහණය සදහා දෙවැනි ඉනිමේදී ලකුණු 348 ක ඉලක්කයක් හඹා යමින් සිටි ශ්‍රී ලංකාව කඩුලු 5 ක් දැවී ලකුණු 205 ක් ලබා සිටියා.

නමුත් ඔවුන්ට අද දිනය අවසානයේදී සියලු දෙනා දැවී ලබා ගත හැකි වූයේ ලකුණු 238ක් පමණි.

අද දිනයේ පළමු කඩුල්ල නොහොත් ඉනිමේ 6 වැනි කඩුල්ල ලෙස කුසල් මෙන්ඩිස් ලකුණු 46 කට දවා ගැනීමට කේෂාව් මහරාජ් සමත් වුණේ තරඟයේ ජයග්‍රහණය පිළිබද ශ්‍රී ලංකාව තබා තිබූ බලාපොරොත්තු බිඳ දමමින්.

අනතුරුව ධනංජය ද සිල්වා ලකුණු 50 කට දැවී ගියේ කාගිසෝ රබාඩාගේ පන්දුවක් හමුවේයි.

ධනංජය හා මෙන්ඩිස් අතර 6 වැනි කඩුල්ලට ගොඩ නැගී තිබූ සම්බන්ධතාවය ලකුණු 97 (159)කි.

ප්‍රභාත් ජයසූරිය ලකුණු 9 කටත්, විශ්ව ප්‍රනාන්දු ලකුණු 5 කටත්, ලහිරු කුමාර එක් ලකුණකටත් දවා ගනිමින් දකුණු අප්‍රිකාව තරඟයේ ජය මෙන්ම තරඟාවලියේ ජය ද තරඟ 2-0 ක් ලෙස තහවුරු කර ගන්නේ මේ අනුවයි.

ශ්‍රී ලංකා ඉනිම වෙනුවෙන් කමිදු මෙන්ඩිස් ලකුණු 35 ක් හා ඇන්ජෙලෝ මැතිව්ස් ලකුණු 32 ක් ලබා ගත අතර, මෙම තරඟයෙන් ශ්‍රී ලංකාව පරාජයට පත් වීමට බෙහෙවින් බලපානු ලැබුවේ ඔවුන්ට ඉහළ ලකුණු සංඛ්‍යාවක් කරා සිය ඉනිම් පරිවර්තනය කර ගැනීමට නොහැකි වීම නිසයි.

පන්දු යැවීමේ දී කේෂාව් මහරාජ් ලකුණු 76 කට කඩුලු 5 ක් දවා ගත් අතර, කාගිසෝ රබාඩා හා ඩේන් පැටර්සන් කඩුලු 2 බැගින් බිද හෙලනු ලැබුවා.

තරගයේ පළමුව පන්දුවට පහරදුන් දකුණු අප්‍රිකාව සියලු දෙනා දැවී ලකුණු 358 ක් ලබා ගත් අතර පිළිතුරු ලෙස ශ්‍රී ලංකාව ලබා ගත් මුළු ලකුණු සංඛ්‍යාව 328කි.

එහිදී දකුණුු අප්‍රිකාව දෙවැනි ඉනිමට ලකුණු 317 ක් ලබා ගනු ලැබුවා.

ඩේන් පැටර්සන් තරගයේ වීරයා ලෙසත් ටෙම්බා බවූමා තරගාවලියේ වීරයා ලෙසයි සම්මානයෙන් පිදුම් ලැබුවේ.