මාතර පොල්හේන ප්‍රදේශයේ අන්තර්ජාතික ක්‍රිකට් පුහුණු පාසලක් සහ ක්‍රීඩාංගනයක් ඉදිකිරීමට රජය ගෙන ඇති තීරණය සම්බන්ධයෙන් වත්මන් ජාතික ක්‍රීඩා කමිටුවේ සමාජික, හිටපු ක්‍රිකට් ක්‍රිඩක රොෂාන් මහානාම කනස්සල්ල පළකර තිබෙනවා.
කර්මාන්ත සහ ව්‍යවසායකත්ව සංවර්ධන අමාත්‍ය සුනිල් හදුන්නෙත්ති විසින් ක්‍රිකට් ආයතනය සමඟ ආරම්භ කිරිමට සැලසුම් කරන මෙම ක්‍රිඩාංගණය සම්බන්ධ ව්‍යාපෘතිය පසුපස ඇති අරමුණු සහ අභිප්‍රායන් පිළිබදව ප්‍රශ්න කළ යුතු බවයි මුහුණු පොතේ සටහනක් තබමින් ඔහු ප්‍රකාශ කර ඇත්තේ.
එමෙන්ම නව ක්‍රිකට් ක්‍රීඩාංගණ සඳහා ආයෝජනය කරනවාට වඩා රට පුරා සිටින යොවුන් ක්‍රිකට් ක්‍රීඩකයන්ට වඩා හොඳ සහයෝගයක් ලබාදීම සඳහා පවතින පහසුකම් වැඩිදියුණු කිරීමට පවතින මුදල් වෙන්කළ යුතු බවට ඔහු යෝජනා කර තිබෙනවා.
මහානාම පැවසුවේ මෙම ව්‍යාපෘතිය සම්බන්ධයෙන් වත්මන් ජනාධිපතිවරයාගේ සහ අගමැතිවරියගේ අවධානයට ලක්විය යුතු බවට තමන් විශ්වාසය පළ කරන බවයි.
මේ අතර මාතර පොල්හේන අන්තර්ජාතික ක්‍රිකට් පුහුණු පාසලේ සහ ක්‍රීඩාංගණයේ මූලික කටයුතු මසක් ඇතුළත අවසන් කිරීමට බලාපොරොත්තු වන බව අමාත්‍ය සුනිල් හඳුනෙත්ති පසුගියදා ප්‍රකාශ කළා.
