ක්‍රිකට් ක්‍රීඩා නොකරන පාසල් තුළ ක්‍රිකට් ක්‍රීඩාව ප්‍රවර්ධනය කිරීමේ ව්‍යාපෘතිය උතුර පළාතෙන් ආරම්භ කර තිබෙනවා.
එහි පළමු වැඩසටහන පැවැත්වූයේ ඊයේ (15) දින කිලිනොච්චිය ක්‍රීඩා සංවර්ධන ශාලාවේ දීයි.
එම වැඩසටහන යටතේ කිලිනොච්චි දිස්ත්‍රික් කුසලතා සංවර්ධන ශාලාවට ක්‍රීඩා උපකරණ ලබාදීම තරුණ කටයුතු හා ක්‍රීඩා අමාත්‍ය සුනිල් කුමාර ගමගේ මහතාගේ ප්‍රධානත්වයෙන් සිදු කෙරුණා.
එම වැඩසටහන යටතේ උතුරු පළාතේ ක්‍රිකට් ක්‍රීඩා නොකරන පාසල් 47 ක් සඳහා ක්‍රීඩා උපකරණ ලබා දීමට නියමිතයි.
මෙහිදී අදහස් දක්වමින් තරුණ කටයුතු හා ක්‍රීඩා අමාත්‍ය සුනිල් කුමාර ගමගේ මහතා පැවසුවේ, ග්‍රාමීය ප්‍රදේශවල පාසල් දරුවන් ක්‍රිකට් ක්‍රීඩාවට එකතු කර ගැනීම මෙම ව්‍යාපෘතියේ ප්‍රධාන අරමුණක් බවයි.
සහජීවනය වර්ධනය කිරීමේ ප්‍රධාන මාර්ගයක් ලෙස ද ක්‍රීඩාව උපයෝගි කරගත හැකි බවත් අමාත්‍යවරයා මෙහිදි පෙන්වා දුන්නා.
එබැවින් උතුර පළාතෙන් මෙම ව්‍යාපෘතිය ආරම්භ කිරීමට තීරණය කළ බවයි අමාත්‍යවරයා ප්‍රකාශ කළේ.
ශක්තිමත් ජාතික ක්‍රිකට් කණ්ඩායමක් නිර්මාණය කිරීම සඳහා පදනමක් ගොඩනැගීම හා මානව සම්පත හඳුනා ගැනීම තුළින් ක්‍රිකට් ක්‍රීඩාව යහපත් ලෙස වර්ධනය කිරීම අරමුණු කරගනිමින් පාසල් ක්‍රිකට් ක්‍රීඩාව සංවර්ධනය කිරීමේ ව්‍යාපෘතිය ක්‍රියාත්මක කිරීමට නියමිතයි.
එම ව්‍යාපෘතිය වෙනුවෙන් රජය 2025 අයවැයෙන් රුපියල් මිලියන 1500ක මුදල් ප්‍රතිපාදන වෙන් කර තිබෙනවා.
