ඕස්ට්‍රේලියාවේ උතුරු ක්වීන්ස්ලන්ඩ් ප්‍රදේශයේ ඇති වී තිබෙන ගංවතුර තත්ත්වය හේතුවෙන් එක් පුද්ගල මරණයක් මේ වනවිට වාර්තා වී ඇති අතර දහස් ගණනක් සිය නිවාස හැර ගොස් ඇති බව විදෙස් මාධ්‍ය වාර්තා කරනවා.
සිකුරාදා සිට ඕස්ට්‍රේලියාවේ උතුරු ක්වීන්ස්ලන්තයට අධික වර්ෂාපතනයක් ලැබෙන අතර ඇති වූ හදිසි ගංවතුර තත්ත්වයෙන් පසු දහස් ගණනකට ටවුන්ස්විල් නගරය සහ ඒ ආශ්‍රිත ප්‍රදේශවලින් ඉවත් වන ලෙසයි දැනුම් දී ඇත්තේ.
අධික වේගයෙන් ගලා යන ගංවතුර අනතුරුදායක මට්ටම් දක්වා ඉහළ ගොස් ඇති අතර ග්‍රාමීය නගරයක් වන ඉන්ග්හැම්හිදී ගංවතුරෙන් පීඩාවට පත් පිරිස් ගළවා ගැනීමට ගිය බෝට්ටුවක් පෙරලීමෙන් 60 හැවිරිදි කාන්තාවක් මිය ගොස් තිබෙනවා.
ගංවතුර හේතුවෙන් ඔලේර ඔයේ කොන්ක්‍රීට් පාලමක කොටසක් ද ගසාගෙන ගොස් ඇති බව සඳහන්.
උතුරු ක්වීන්ස්ලන්තයේ මහා බාධක පරය අසල පිහිටා ඇති ජනප්‍රිය වෙරළබඩ සංචාරක ගමනාන්තයක් වන ටවුන්ස්විල් ප්‍රදේශය ගංවතුර හේතුවෙන් කළු කලාපයක් ලෙස ප්‍රකාශයට පත් කර තිබෙනවා.
එසේම එම කලාපය තුළ සංචාරක අනතුරු ඇඟවීමක් නිකුත් කර ඇති අතර බලධාරීන් විසින් ටවුන්ස්විල් ගුවන් තොටුපළ තාවකාලිකව වසා දමා ඇති බව සඳහන්.
එරට කාලගුණ අංශ සදහන් කළේ, පවතින අධික වර්ෂාවේ වැඩි වීමක් ඉදිරියේදී ද අපෙක්ෂා කරන බවයි.
මෙය වසර 60 කට පසු එම කලාපයට ඇති වූ දරුණුතම ගංවතුර තත්ත්වය විය හැකි බවට කාලගුණ විද්‍යාඥයින් අනතුරු අඟවනවා.
