විදුලි බල මණ්ඩලය හෝ එහි ආයතන විකුණා දැමීමක් සිදු නොකරන බව බලශක්ති අමාත්‍ය ඉංජිනේරු කුමාර ජයකොඩි මහතා පවසනවා.
බලශක්ති හා මූල්‍ය ක්ෂේත්‍රවල රජයට අයිති අධිපතීත්වය, හිමිකාරීත්වය ආරක්ෂා කරගත යුතු බව මැතිවරණයට පෙර සිටම ප්‍රකාශ කළ බැවින් එම පොරොන්දු එලෙසම ක්‍රියාත්මක කරන බවයි අමාත්‍යාවරයා පෙන්වා දෙන්නේ.
ඔහු මේ බව කියා සිටියේ, නොරොච්චෝලේ ලක්විජය විදුලිබලාගාරයේ නිරීක්ෂණ චාරිකාවකට එක්වෙමින්.
කිසිදු අයුරකින් මෙම ආයතන විකිණිමක් නොකරන බවත්, ප්‍රතිව්‍යුහගතකරණය හරහා විදුලිය නිෂ්පාදනය, සම්ප්‍රේෂණය හා බෙදාහැරීම යන කොටස් වෙන්කිරීම පමණක් සිදුකරන බවයි අමාත්‍යාවරයා පවසන්නේ.
ඒවා සියයට සියයක් රජය සතු සමාගම් ලෙස පවත්වාගෙන යන බවත් කිසිදු කොටසක් පුද්ගලික අයිතියට පවරන්නේ නැති බවත් අමාත්‍යාවරයා මෙහිදි වැඩි දුරටත් සඳහන් කළා.
ඒ හේතුවෙන් ආයතනවල අනාගතය මෙන්ම සේවකයින්ගේ රැකියා සුරක්ෂතතාවය තහවුරු කෙරෙනු ඇති බවයි බලශක්ති අමාත්‍ය ඉංජිනේරු කුමාර ජයකොඩි මහතා පෙන්වා දෙන්නේ.
