නිරිත දිග බෙංගාල බොක්ක ප්‍රදේශයේ පවතින ගැඹුරු පීඩන අවපාතය ඉදිරි පැය 03 තුළ සුළි කුණාටුවක් දක්වා වර්ධනය වෙමින් තමිල්නාඩු වෙරළ දක්වා ගමන් කිරීමට වැඩි හැකියාවක් පවතින බව ආපදා කළමණාකරන මධ්‍යස්ථානය පවසනවා.
මේ හේතුවෙන් උතුර පළාතේ දැනට පවතින වැසි සහ සුළං සහිත කාලගුණ තත්ත්වය තවදුරටත් බලාපොරොත්තු විය හැකියි.
දිවයින වටා වන ගැඹුරු හා නොගැඹුරු මුහුදු ප්‍රදේශ සහ ගොඩබිම සඳහා කාලගුණ විද්‍යා දෙපාර්තමේන්තුව රතු නිවේදනයක් ද නිකුත් කර තිබෙනවා.
අද (29) පස්වරු 6 එම නිවේදනය නිකුත් කර ඇති අතර, ජනතාවට අවධානයෙන් පසුවෙන ලෙසයි එම දෙපාර්තමේන්තුව දැනුම් දෙන්නේ.
මෙම තත්ත්වය හමුවේ උතුර පළාතේ ඇතැම් ස්ථානවලට මි.මී. 100 ට වැඩි තද වැසි ඇතිවිය හැකි යි.
එමෙන්ම, බස්නාහිර, සබරගමුව, මධ්‍යම සහ වයඹ පළාත් වලත් ගාල්ල සහ මාතර දිස්ත්‍රික්කවලත් විටින් විට වැසි ඇති වීමේ හැකියාවක් පවතිනවා.
සෙසු ප්‍රදේශවල සවස් කාලයේදී හෝ රාත්‍රී කාලයේදී තැනින් තැන වැසි හෝ ගුගුරුම් සහිත වැසි ඇති විය හැකියි.
