බස්නාහිර පළාත තුළ ක්‍රියාත්මක වන සුපිරි වෙළඳ සල්වල නියෝජිතයින් සහ බස්නාහිර පළාත් ආණ්ඩුකාර හනීෆ් යූසුෆ් මහතා අතර විශේෂ සාකච්ඡාවක් පවත්වා තිබෙනවා.
ඒ ජනාධිපති අනුර කුමාර දිසානායක මහතාගේ “Clean Sri Lanka” මෙහෙයුමට සමගාමීවයි.
බස්නාහිර පළාත තුළ සුපිරි වෙළඳ සැල්වල වැසිකිලි පද්ධති මහජනතාවගේ ප්‍රයෝජනය සඳහා ද විවෘත කරන ලෙස මෙහිදී ආණ්ඩුකාරවරයා විසින් ඒවායේ නියෝජිතයන්ගෙන් කරන ලද ඉල්ලීමට ඔවුන්ගේ එකඟතාවය ලැබී ඇති බවයි ආණ්ඩුකාරවරයාගේ මාධ්‍ය අංශය නිවේදනය කළේ.
එසේම වෙළඳ සැල් ආශ්‍රිතව කුණු කසල බැහැර කිරීම නිසි ආකාරයෙන් සිදුකරන ලෙසත් වෙළඳසැල් තුළට විවිධ පාරිභෝගික හිතසුව පිණිස අවශ්‍ය වටපිටාව සකසන ආකාරය ගැනත් මෙහිදී අවධානයට යොමු වී තිබෙනවා.
ඊට අමතරව, සුපිරි වෙළඳසැල් කිහිපයක් හෝ තෝරගත් ප්‍රදේශ ආශ්‍රිත ඒවා පැය 24ම විවෘත කර තැබීමේ වැදගත්කම මෙහිදී ආණ්ඩුකාරවරයා අදාළ නියෝජිතයින්ගේ අවධානයට යොමු කළ අතර, ඒ පිළිබඳව ද ඔවුන් සාකච්ඡා කොට තීන්දුවක් ලබා දෙන බවටයි සහතික වී ඇත්තේ.
