ඕස්ට්‍රේලියාව වයස අවුරුදු 16 ට අඩු ළමුන් සඳහා සමාජ මාධ්‍ය තහනම් කිරීමට නව නීතියක් ඉක්මනින් සම්මත කර ගැනීමට කටයුතු කර ඇති බව විදෙස් වාර්තා පවසනවා.
එරට පාර්ලිමේන්තු වර්ෂය අවසන් වීමට පෙර මෙම පනත් කෙටුම්පත සම්මමත කර ගැනීමටයි රජය උනන්දු වන්නේ.
මෙම සමාජ මාධ්‍ය තහනම සඳහා පාර්ලිමෙන්තුවේ ද්විපාර්ශ්වික සහයෝගය ලබා ගැනීමට අගමැතිවරයා ප්‍රමුඛ රජය අපේක්ෂා කරන අතර එය සෙනෙට් සභාවට ඉදිරිපත් කිරීමට නියමිතයි.
මෙවන් පසුබිමක, ගූගල් සහ ෆේස්බුක් සමාගම්, මෙම පනත් කෙටුම්පත තවදුරටත් පමා කරන ලෙස ඔස්ට්‍රේලියානු රජයෙන් ඉල්ලා සිටින බව සඳහන්.
සමාජ මාධ්‍ය අධික ලෙස භාවිතා කිරීම දරුවන්ගේ ශාරීරික හා මානසික සෞඛ්‍යයට අවදානම් ඇති බව තර්ක කර ඇති ඔස්ට්‍රේලියානු අගමැතිවරයා මේ සඳහා ඕස්ට්‍ර්ලියාවේ දෙමාපියන්ගේ සහය ද අපේක්ෂා කරනවා.
නමුත් එරට මානව හිමිකම් කොමිසම ඇතුළු සමහර තරුණ නීතීඥයින් මෙම නීතිය මගින් දරුවන්ගේ ස්වයං ප්‍රකාශන අයිතියට හානියක් වේ යැයි කනස්සල්ලක් මතු කර ඇතත්, බොහෝ ඔස්ට්‍රේලියානුවන් මෙම තහනමට සහය දක්වන බවයි වාර්තා වන්නේ.
කෙසේ වෙතත් මෙම නව නීතිය සම්මත වීමෙන් පසුව , එය උල්ලංඝනය කරන සමාගම්වලට ඕස්ට්‍රේලියානු ඩොලර් මිලියන 49.5 (අමෙරිකානු ඩොලර් මිලියන 32) දක්වා දඩ නියම කරන බවද සඳහන්.
