ලෝක උරුමයක් වන සීගිරියේ සංරක්ෂණ කටයුතු පුළුල් කර සංචාරක ආකර්ෂණය වැඩි කිරීම සඳහා කොරියානු අන්තර්ජාතික සහයෝගිතා ඒජන්සිය (KOICA) විසින් රුපියල් බිලියන 2.4ක ආධාරයක් ලබා දීමට නියමිතව තිබෙනවා.
ඒ විශේෂ ව්‍යාපෘතියක් ක්‍රියාත්මක කිරීමටයි.
පුරාවිද්‍යා දෙපාර්තමේන්තුවේ පූර්ණ අනුමැතිය සහිතව මධ්‍යම සංස්කෘතික අරමුදලේ අධීක්ෂණය මත මෙම ව්‍යාපෘතිය ක්‍රියාත්මක කෙරෙනු ඇති.
මෙමගින්,
1.සීගිරි පර්වතයට පිවිසෙන මාර්ගය සංවර්ධනය කිරීම.
2.විකල්ප ප්‍රවේශ මාර්ගයක් ඉදිකිරීම.
3.සීගිරි කෞතුකාගාරය, ආපන ශාලාව සහ ප්‍රවේශ පත්‍ර කවුළුව ආදිය සංවර්ධනය කිරීම.
ඇතුළු යෝජනා රැසක් ක්‍රියාත්මක කිරීමට සැලසුම් කර තිබෙනවා.
ඒ අනුව මෙම ව්‍යාපෘතිය සඳහා බුද්ධශාසන,ආගමික හා සංස්කෘතික කටයුතු අමාත්‍යංශයේ උපදෙස් පරිදි මධ්‍යම සංස්කෘතික අරමුදල සහ කොරියානු අන්තර්ජාතික සහයෝගිතා ඒජන්සිය (KOICA) අතර අවබෝධතා ගිවිසුමක් අත්සන් තැබීමට නියමිතයි.
මීට අදාළ සාකච්ඡාවක් අද(27) පෙරවරුවේ බුද්ධශාසන,ආගමික හා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි මහතාගේ ප්‍රධානත්වයෙන් අමාත්‍යංශයේ දී පවත්වා ඇති අතර මෙම කරුණු සම්බන්ධයෙන් එහිදී පුළුල් ලෙස අදහස් හුවමාරු කරගෙන තිබෙනවා.
