මෙරට මුහුදු සීමාව තුළ අනවසර ධීවර කටයුතු සිදු කළ ඉන්දීය ධීවර යාත්‍රා දෙකක් 2ක් සමඟ ඉන්දීය ධීවරයින් දාහත් දෙනෙකු අත්අඩංගුවට ගැනීමට නාවික හමුදාව කටයුතු කර තිබෙනවා.
ඊයේ (23 )දින මන්නාරමට උතුරින් වූ මෙරට මුහුදු සීමාවට ඇතුළු වී අනවසර ධීවර කටයුතු සිදු කළ ඉන්දීය ධීවර යාත්‍රා රැසක් උතුරු මැද නාවික විධානය මඟින් නිරීක්‍ෂණය කර, එම ධීවර යාත්‍රා මෙරට මුහුදු සීමාවෙන් ඔබ්බට පළවා හැරීමේ විශේෂ සෝදිසි මෙහෙයුමක් දියත් කර තිබෙනවා.
එහිදී, මෙරට මුහුදු ප්‍රදේශයේ අනවසර ධීවර කටයුතු සිදු කරමින් සිටි ඉන්දීය ධීවර යාත්‍රා දෙකක් 02 ක් සමඟ ඉන්දීය ධීවරයින් දාහත් දෙනෙකු මෙලෙස අත්අඩංගුවට ගෙන ඇති බව සඳහන්.
මෙම මෙහෙයුම මඟින් අත්අඩංගුවට ගත් ඉන්දීය ධීවර යාත්‍රා දෙක සහ එහි සිටි ඉන්දීය ධීවරයින් දාහත් දෙනා තලෛමන්නාරම ජැටිය වෙත රැගෙන විත් ඇති අතර, ඉදිරි නීතිමය කටයුතු සඳහා මන්නාරම ධීවර පරීක්‍ෂක කාර්යාලය වෙත භාර දීමට නියමිතයි.
මෙම මෙහෙයුමත් සමඟ 2024 වර්ෂයේ මේ දක්වා සිදු කළ මෙහෙයුම් මඟින්, මෙරට මුහුදු සීමාව තුළ අනවසර ධීවර කටයුතු සිදුකල ඉන්දීය ධීවර යාත්‍රා හැත්තෑ දෙකක් සහ ඉන්දීය ධීවරයින් පන්සිය පනස් හතර දෙනෙකු නාවික හමුදාව සහ වෙරළ ආරක්‍ෂක දෙපාර්තමේන්තුව විසින් අත්අඩංගුවට ගෙන ඉදිරි නීතිමය කටයුතු සඳහා යොමු කර තිබෙන බව සඳහන්.
