මීගොඩ නාගහවත්ත ප්‍රදේශයේ සිදු වූ වෙඩි තැබීමට සම්බන්ධ තවත් සැකකරුවන් තිදෙනෙක් අත්අඩංගුවට ගෙන තිබෙනවා.
පසුගිය 14 වැනිදා මීගොඩ නාගහවත්ත ප්‍රදේශයේ දි මෝටර් රථයකින් ගමන් කරමින් සිටි පුද්ගලයෙක් වෙඩි තබා ඝාතනය කර තිබුණා.
මෙම සිද්ධිය සම්බන්ධයෙන් මීගොඩ පොලිසිය සහ බස්නාහිර දකුණ අපරාධ කොට්ඨාසය එක්ව විමර්ශනයක් ආරම්භ කළා.
මේ අනුව පසුගිය 19 වැනිදා බස්නාහිර දකුණ අපරාධ කොට්ඨාසයේ නිලධාරීන් මෙම වෙඩි තැබීමට සම්බන්ධ වෙඩික්කරු සහ ඊට ආධාර අනුබල දුන් තවත් සැකකරුවෙක් අත්අඩංගුවට ගනු ලැබුවා.
ඔවුන්ගෙන් සිදු කළ ප්‍රශ්න කිරීම් හමුවේ මෙම වෙඩි තැබීමට සම්බන්ධ තවත් සැකකරුවන් තිදෙනෙක් ඊයේ දිනයේ හෝමාගම සහ මීගොඩ යන ප්‍රදේශවලදී අත්අඩංගුවට ගෙන තිබෙනවා.
සැකකරුවන් වයස අවුරුදු 22,26 සහ 38 යන වයස්වල පසුවන මීගොඩ සහ පාදුක්ක යන ප්‍රදේශවල පදිංචිකරුවන් බව සඳහන්.
මොවුන්ගෙන් එක් අයෙක් වෙඩික්කරු සමග පැමිණි අයෙක් වන අතර අනෙක් සැකකරුවන් දෙදෙනා ආධාර අනුබලදීමේ චෝදනා මත අත්අඩංගුවට ගෙන තිබෙන බවයි පැවසෙන්නේ.
සැකකරුවන් අධිකරණය හමුවට ඉදිරිපත් කිරීමට නියමිත අතර මීගොඩ පොලිසිය සහ බස්නාහිර දකුණ අපරාධ කොට්ඨාසය මේ සම්බන්ධයෙන් වැඩිදුර විමර්ශන සිදුකරනු ලබනවා.
