නියෝජ්‍ය කතානායක රිස්වි සාලි විසින් සිය අධ්‍යාපන සුදුසුකම් සම්බන්ධයෙන් නිවේදනයක් නිකුත් කර තිබෙනවා.
ඒ සිය ෆේස්බුක් ගිණුමෙහි සටහනක් තබමින්.
නායකත්වය පිළිබඳ විශ්වාසය හා වගවීම පවත්වා ගැනීමේ අත්‍යවශ්‍ය හේතුවෙන් වෘත්තීය සුදුසුම් අනාවරණ කරන බවයි රිස්වි මහතා සඳහන් කරන්නේ.
ඒ අනුව නියෝජ්‍ය කතානායකවරයා 1986 වසරේ පකිස්ථානයේ මුල්තාන්හි නිෂ්තාර් වෛද්‍ය විද්‍යාලයෙන් සිය උපාධිය සම්පූර්ණ කර තිබෙනවා.
එමෙන්ම කොළඹ විශ්වවිද්‍යාලයෙන් Laryngo Otorhinology (DLO) ඩිප්ලෝමාව ද අවසන් කර ඇති බවයි කියන්නේ.
තවද එහි සඳහන් වන්නේ වසර 38ක කාලයක් ශ්‍රී ලංකා වෛද්‍ය සභාවේ ලියාපදිංචි වී වෛද්‍යවරයෙක් ලෙස කටයුතු කළ බවයි.
පිට පළාත්වල මෙන්ම කොළඹ දිස්ත්‍රික්කයේ පිහිටා ඇති විවිධ රෝහල්වල ද ඔහු සේවය කර තිබෙනවා.
වසර 12ක් රජයේ වෛද්‍යවරයෙක් ලෙස ඔහු සේවය කර ඇති බව කියයි.
රිස්වි සාලි මහතා තැබූ සටහනේ වැඩිදුරටත් දැක්වෙන්නේ ඉන් අනතුරුව සාමාන්‍ය වෛද්‍යවරයෙක් ලෙස ප්‍රජාව වෙනුවෙන් තම සේවය කළ බවයි.
ජාතික ජනබලවේගයේ පාර්ලිමේන්තු මන්ත්‍රීවරුන්ගේ අධ්‍යාපනය සම්බන්ධයෙන් සමාජය තුළ කතාබහක් නිර්මාණයවී ඇති පසුබිමකයි ඔහු සිය සුදුසුකම් පවසා ඇත්තේ.
