රුපියල් එක් කෝටි හැත්තෑ හතර ලක්ෂ, පනස් දහස් අට සිය හැත්තෑ පහක් වටිනා මැණික් තොගයක් ඇඳ සිටි යට ඇදුම් අතර සඟවා ගෙන චීනය වෙත රැගෙන යාමට තැත් කළ චීන ජාතික පියෙකු සහ දියණියක ඊයේ ( 13) රාත්‍රී කටුනායක ගුවන් තොටුපොළ පිටත්වීමේ පර්යන්තයේ දී රේගු නිලධාරීන් පිරිසක් විසින් අත් අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ 45 හැවිරිදි වියේ පසුවන පුද්ගලයෙක් සහ ඔහුගේ දියණිය වන 21 හැවිරිදි තරුණියක්.
මෙරට නේවාසික වීසා හිමි ඔවුන් ශ්‍රී ලංකාවේ විවිධ පළාත් වල සැරිසරමින් ව්‍යාපාරික කටයුතු වල නිරත වී තිබෙන බවයි පැවසෙන්නේ.
මොවුන් සතුව තිබී චන්ද්‍රකාන්ති , ගෝමේද , ආරනූල් , වෛරෝඩි සහ පච්ච යන වර්ග වලට අයත් ග්‍රෑම් 689.5 ක් බර මැණික් තොගයක් සොයාගෙන තිබෙනවා.
මේ පිළිබඳ රේගු පරීක්ෂණය අද (14 ) පස්වරුව වන තෙක් පැවැත් වූ අතර , එහිදී මෙම මැණික් තොගය රාජසන්තක කිරීමට රේගු නියෝජ්‍ය අධ්‍යක්ෂවරයා තීරණය කළ බව සඳහන්.
චීන ජාතිකයින් දෙදෙනාට රුපියල් ලක්ෂය බැගින් රුපියල් ලක්ෂ දෙකක දඩ මුදලක් ගෙවන ලෙස ද නියෝග කර තිබෙනවා
