ත්‍රිරෝද රථවල අමතර උපාංග සවි කළ හැකි නෛතික රාමුව හා සීමාවට අනුකූලව ත්‍රීරෝද රථවල නීත්‍යානුකූලව සවිකර ඇති කොටස් ඉවත් නොකිරීමට කටයුතු කරන බව වැඩබලන පොලිස්පති ප්‍රියන්ත වීරසූරිය මහතා ප්‍රකාශ කර තිබෙනවා.
ඒ සමස්ත ලංකා ත්‍රිරෝද රථ උපාංග කොටස් නිෂ්පාදකයන් හා අළෙවිකරුවන්ගේ සංගමයේ සාමාජිකයන් සමග පැවති සාකච්ඡාවකින් අනතුරුවයි.
වර්තමානයේ ඔවුන් මුහුන පා ඇති ගැටලු සම්බන්ධයෙන් අද (15) පොලිස් මූලස්ථානයේ දි මෙම සාකච්ඡාව පවත්වා තිබෙනවා.
ඒ සඳහා බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පති මහින්ද ගුණරත්න මහතා, නීති දිසාව භාර නියෝජ්‍ය පොලිස්පති රුවන් ගුණසේකර මහතා, රථවාහන හා මාර්ග ආරක්ෂාව දිසාව භාර නියෝජ්‍ය පොලිස්පති ඉන්දික හපුගොඩ මහතා, පොලිස් ප්‍රවාහන කොට්ඨාසය භාර ජ්‍යෙෂ්ඨ පොලිස් අධිකාරි මංජුල මහගිරිල්ල මහතා හා පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි බුද්ධික මනතුංග මහතා ඇතුළු පොලිස් නිලධාරීන් කණ්ඩායමක් සහභාගී වි සිට ඇති බව සඳහන්.
සමස්ථ ලංකා ත්‍රිරෝද රථ උපාංග කොටස් නිෂ්පාදකයන්ගේ සහ අලෙවිකරුවන්ගේ සංගමයේ සාමාජිකයින් විසින් ඔවුන්ගේ කර්මාන්ත ශාලා වැසීයාම හා ඔවුන්ගේ රැකියා අහිමිවීම සම්බන්ධයෙන් පොලිස්පතිවරයා සමග පුළුල් ලෙස සාකච්ඡා කර තිබෙනවා.
ඒ අනුව, 2021 වර්ෂයේ නිකුත් කරන ලද අංක 22/40/37 දරන ගැසට් පත්‍රය මඟින් ත්‍රීරෝද රථවල අමතර උපාංග සවි කළ හැකි නෛතික රාමුව හා සීමාවන් පිළිබඳව සහ එයට අනුකූලව ත්‍රීරෝද රථවල නීත්‍යානුකූලව සවිකර ඇති කොටස් ඉවත් නොකිරීමටත්, එසේ නොවන අන්තරාදායක ආකාරයෙන් සවි කර ඇති කොටස් ඉවත් කිරීමට කටයුතු කරන බවත් පොලිස්පතිවරයා ඔවුන්ට දැනුම් දී තිබෙන බව සදහන්.
ලබා දී ඇති මාස 03ක සහන කාලය තුළ ත්‍රිරෝද රථ රියදුරන් දැනුවත් කර එම නීත්‍යානුකූල නොවන අමතර කොටස් ඔවුන් ලවා ඉවත් කරවීමට මෙහිදී එකඟ වී තිබෙනවා.
ත්‍රිරෝද රථ උපාංග කොටස් නිෂ්පාදකයන්ගේ සහ අලෙවිකරුවන්ගේ රැකියා අහිමි කිරීමට ශ්‍රී ලංකා පොලිසිය කිසිවිටකත් කටයුතු නොකරන බවටත් මෙම සීමාවන් පනවා ඇත්තේ මාර්ගය භාවිතා කරන සෙසු පුද්ගලයන්ගේ, ත්‍රීරෝද රථ රියදුරන්ගේ හා එහි ගමන් ගන්නා මගීන්ගේ ආරක්ෂාව වෙනුවෙන් බවත් වැඩබලන පොලිස්පතිවරයා මෙහිදි වැඩිදුරටත් අවධාරණය කර ඇති බව සඳහන්.
