නව රජයේ බලශක්ති ප්‍රතිපත්තියට හා වැඩ පිළිවෙලට අනුකූලව ත්‍රිකුණාමලයේ තෙල් ටැංකි සංකීර්ණය හරහා රටට විශාල විදේශ විනිමයක් උපයා ගැනීමට කටයුතු කරන බව බලශක්ති අමාත්‍ය ඉංජිනේරු කුමාර ජයකොඩි මහතා පවසනවා.
ඒ සදහා ලංකා IOC ආයතනය හා ලංකා ඛණිජ තෙල් සංස්ථාව එක්ව කටයුතු කරන බවයි අමාත්‍යාවරයා පවසන්නේ.
ඉන්දියානු හා ලාංකීය හවුල්කාරීත්වය සහිතව සාදා ඇති Trinco Petroleum Terminal Ltd ආයතනය හරහා ඒ කටයුතු ඉදිරියට ක්‍රියාත්මක කෙරෙන බව අමාත්‍යාවරයා පෙන්වා දුන්නා.
බලශක්ති අමාත්‍ය ඉංජිනේරු කුමාර ජයකොඩි මහතා මෙම අදහස් පළ කළේ ත්‍රිකුණාමලය තෙල් ටැංකි පරිශ්‍රයේ නිරීක්ෂන චාරිකාවකට එක්වෙමින්.
බ්‍රිතාන්‍යය යුගයේ ඉදිකළ මෙම ටැංකි ඉතා හොඳ තත්ත්වයේ තිබෙන බවත් අවශ්‍යය සුළු ප්‍රතිසංස්කරණ කටයුතු කර නල පද්ධතිය ඉදි කර නෞකාවලට තෙල් සැපයීමට ගබඩා සංකීර්ණයක් ලෙස භාවිතා කළ හැකි බවයි අමාත්‍යවරයා මෙහිදි පෙන්වා දුන්නේ.
මෙම නිරීක්ෂණ චාරිකාවට එක්වෙමින් සිවිල් ගුවන්සේවා හා වරාය නියෝජ්‍ය අමාත්‍ය රුවන් ජනිත කොඩිතුවක්කු මහතා සදහන් කළේ ලෝකයේ පස්වෙනි විශාලම ස්වභාවික වරාය හැටියට හඳුන්වන ත්‍රිකුණාමල වරාය ජාතික ආර්ථිකයට වඩාත් ඵලදායි ලෙස භාවිත කරන සැලැස්ම හඳුනාගැනීම වෙනුවෙන් අමාත්‍යංශ දෙකම එක්ව කටයුතු කරන බවයි.
