2024 වසරේදී ශ්‍රී ලංකා රේගුව, ඉතිහාසයේ වසරක් තුළ ලබාගත් ඉහළම ආදායම ලබා ගනිමින්, රුපියල් ට්‍රිලියන 1.5 හේ සීමාව ඉක්මවමින්, වාර්ථාගත ආදායමක් උපයා ගැනීමට සමත් ව තිබෙනවා.
ඊයේ (31) දින දහවල් 11 වන විට රුපියල් ට්‍රිලියන 1.5 සීමාව ඉක්මවූ රේගු ආදායම, දිනය අවසානයේදී රුපියල් ට්‍රිලියන 1.515 ක් දක්වා වර්ධනය වීමට නියමිත බවයි රේගුව පවසන්නේ.
ඒ අනුව, රජය විසින් 2024 වසර සඳහා ලබා දී තිබූ රුපියල් ට්‍රිලියන 1.533 ක ආදායම් ඉලක්කය ඉතා ආසන්නයටම සපුරා ගැනීමට ශ්‍රී ලංකා රේගුවට හැකි වී තිබෙනවා.
රජයේ බදු ප්‍රතිපත්තිය, ආනයන ප්‍රමාණය ඉහළ යාම හා විශේෂයෙන් රේගු කළමනාකාරිත්වය විසින් සිදු කරන ලද බදු එකතු කිරීමේ ක්‍රියාවලිය කාර්යක්ෂම කිරීම සඳහා ගනු ලැබූ ප්‍රතිසංස්කරණ සාර්ථක කර ගැනීම සඳහා සමස්ථ රේගු කාර්ය මණ්ඩලයම කැප වී කටයුතු කිරීම මේ අයුරින් වාර්ථාගත ආදායමක් උපයා ගැනීමට හේතු වී තිබෙන බව සඳහන්.
මෙම ආදායම උපයා ගැනීමට, තමන් ගෙවිය යුතු බදු මුදල් ප්‍රමාණය නිවැරදිව ගෙවමින් දායකත්වයක් ලබා දුන් සියලුම බදු ගෙවන්නන්හට ශ්‍රී ලංකා රේගුව ප්‍රණාමය පුදකර සිටිනවා.
එමෙන්ම, රජය විසින් ලබා දුන් බදු ආදායම් ඉලක්ක සපුරා ගනිමින් රටේ සමස්ථ ආර්ථිකයට ඉහළම දායකත්වයක් ලබා දීමට හැකිවීම පිළිබඳව ශ්‍රී ලංකා රේගුවේ කාර්ය මණ්ඩලය ස්වකීය සතුට ප්‍රකාශ කර සිටිනවා.
