තමන් සම්බන්ධයෙන් පළවන වාර්තාවක් සම්බන්ධයෙන් කම්කරු නියෝජ්‍ය අමාත්‍ය මහින්ද ජයසිංහ මහතා පැහැදිලි කිරීමක් සිදු කරනවා.
මේ වන විට සමාජ මාධ්‍ය ඔස්සේ සංසරණය වන ‘අධ්‍යාපන ඇමති ලෙස හරිනි නිකුත් කළ ගැසට් දෙකම මහින්ද ජයසිංහ ආපසු හරවයි’ යන මැයෙන් පළවූ වාර්තා සම්පූර්ණයෙන් අසත්‍ය බවයි කම්කරු නියෝජ්‍ය අමාත්‍යවරයාගේ මාධ්‍ය ඒකකය නිවේදනයක් නිකුත් කරමින් පවසන්නේ.
ගුරු කාර්යක්ෂමතා කඩයිම් වෙනුවෙන් පවත්වනු ලබන මොඩියුල් පිළිබඳ පසුගියදා චක්‍රලේඛයක් නිකුත් කර තිබුණේ අධ්‍යාපන අමාත්‍යාංශයේ අතිරේක ලේකම්වරියක විසින් බව එම නිවේදනයේ දැක්වෙනවා.
විෂය භාර ඇමතිනිය වන අග්‍රාමාත්‍ය හරිනි අමරසූරිය මෙනවියගේ කිසිදු අනුදැනුමකින් තොරව එම චක්‍රලේඛය නිකුත් කර ඇති බවද පැවසෙනවා.
එමෙන්ම බස්නාහිර පළාතේ රජයේ පාසල්වල ගුරුවරුන්ට සිය පාසලේ ළමුන් වෙනුවෙන් මුදල් ගෙවා උපකාරක පන්ති පැවැත්වීම තහනම් කරමින්ද චක්‍රලේඛයක් නිකුත් කර තිබුණා.
පළාත් අධ්‍යාපන ලේකම්වරිය විසින් එය සිදුකර තිබුණා.
අදාළ චක්‍රලේඛයද විෂය භාර අමාත්‍ය අග්‍රාමාත්‍යවරියගේ කිසිදු අනුදැනුමකින් තොරව නිකුත් කර ඇති බවයි කම්කරු නියෝජ්‍ය අමාත්‍යවරයාගේ මාධ්‍ය ඒකකය පවසන්නේ.
කම්කරු නියෝජ්‍ය අමාත්‍ය මහින්ද ජයසිංහ මහතා මෙම ගැටලුවට මැදිහත් වූයේ දීර්ඝ කාලයක් ලංකා ගුරු සේවා සංගමයේ ලේකම්වරයා ලෙස ගුරු විදුහල්පතිවරුන්ගේ ගැටලු වෙනුවෙන් පෙනී සිටි බැවින් බවයි කම්කරු නියෝජ්‍ය අමාත්‍යාවරයාගේ මාධ්‍ය ඒකකය නිකුත් කළ නිවේදනයේ වැඩිදුරටත් සඳහන් වන්නේ.
