පාසල් පරිශ්‍රවල ඩෙංගු සහ චිකුන්ගුන්යා රෝග නිවාරණය සදහා කටයුතු සිදු කිරීමට අදාළව අධ්‍යාපන අමාත්‍යංශය මාධ්‍ය නිවේදනයක් නිකුත් කර තිබෙනවා.
පසුගිය මැයි 31 වනදා දක්වා දිවයිනේ විවිධ ප්‍රදේශවලින් වාර්තා වූ ඩෙංගු රෝගීන් අතරින් ඉහළ ප්‍රතිශතයක්, වයස අවුරුදු 05ත් 19ත් අතර පාසල් වයසේ පසුවන දරුවන් බව සෞඛ්‍ය අංශ මගින් දැනුවත් කර ඇති බවයි එහි දැක්වෙන්නේ.
එබැවින් පාසල් ආශ්‍රිත පරිසරය මදුරුවන්ගෙන් තොරව ආරක්ෂිතව පවත්වාගෙන යාම සදහා මීට පෙර නිකුත් කළ උපදෙස්වලට අමතරව ගතයුතු ක්‍රියාමාර්ග හා උපදෙස් නිකුත් කර ඇති අතර සිදු දරුවන් හා අධ්‍යයන හා අනධ්‍යයන කාර්ය මණ්ඩලවල සෞඛ්‍ය ආරක්ෂාව වෙනුවෙන් එම උපදෙස් පිළිපදින ලෙස සියලු නිලධාරීන් දැනුවත් කර ඇති බවයි එම අමාත්‍යංශය සදහන් කළේ.
ඒ අනුව, සියලු පාසල් පරිශ්‍ර මදුරුවන් බෝ නොවල ලෙස පවත්වාගෙන යාම සදහා අධ්‍යාපන කටයුතුවලට බාධා නොවන පරිදි පාසල් මගින් සුදුසු අභ්‍යන්තර වැඩපිළිවෙලක් සකස් කර ක්‍රියාත්මක කළ යුතු බවයි එම උපදෙස්වල ප්‍රධාන වශයෙන් දැක්වෙන්නේ.
ඊට අමතරව පාසල් කාලය තුළ මදුරු දෂ්ඨනය අවම කිරීම සදහා මදුරු විකර්ශක ආලේපයට හා අත් පා ආවරණය වන පරිදි සුදුසු ඇදුම් ඇදීමට සිසුන් දැනුවත් කිරීමද එම උපදෙස්වල ඇතුළත්.
