චීන ජාතික සංඛ්‍යාලේඛන පරිපාලනයට අනුව, පළමු කාර්තුවේ චීනයේ දළ දේශීය නිෂ්පාදිතය යුවාන් ට්‍රිලියන 31.9ක් පමණ වී තිබෙනවා.
එය පසුගිය කාලසීමාවට සාපේක්ෂව 5.4% ක වර්ධනයක් වන අතර, පසුගිය වසරේ හතරවන කාර්තුව හා සසඳන විට 1.2% ක වැඩි වීමක් බවයි චීන බලධාරීන් පවසන්නේ.
සමස්තයක් වශයෙන් විමසා බැලීමේදී, විවිධ සාර්ව ආර්ථික ප්‍රතිපත්ති අඛණ්ඩව ඵලදායි ලෙස ක්‍රියාත්මක වීමත් සමග, පළමු කාර්තුවේ දී චීන ජාතික ආර්ථිකයට නිශ්චිතභාවයක් සහ යහපත් ආරම්භයක් ලැබී ඇති බව චීනය පවසනවා.
එමෙන්ම චීන ජාතික ආර්ථිකය යහපත් වීමේ ප්‍රවණතාව අඛණ්ඩ ව දැක ගත හැකි බවත්, නවෝත්පාදනයන්හි මූලිකත්වය හා කාර්යභාරය වැදගත් වෙමින් පවතින අතර, නව විභව ශක්තිය සඳහා සංවර්ධන කටයුතු ද වේගවත් වෙමින් පවතින බවත් චීන මාධ්‍ය වාර්තාවල සඳහන්.
මේ අතර චීන නනිෂ්පාදනයන් සම්බන්ධයෙන් ඇමරිකාව තීරු බදු ඉහළ නැංවීම චීනයේ වෙළදාම හා ආර්ථිකයට කෙටි කාලීන වශයෙන් පීඩනයක් එල්ල කළද චීන ආර්ථිකයේ දිගු කාලීන ධනාත්මක මාවතට එමගින් බලපෑමක් එල්ල නොවන බව චීන ජාතික සංඛ්‍යාලේඛන කාර්යාංශයේ නියෝජ්‍ය අධ්‍යක්ෂ ෂෙන්ග් ලයි යුන් මහතා පවසනවා.
අද (16) පැවති මාධ්‍ය හමුවක දීයි ඔහු මේ බව සඳහන් කළේ.
ඇමරිකාව තීරු බදු බාධක පැනවීම හා වෙළඳ වංචනිකත්වයන් සිදු කිරීමට දැඩි ලෙස විරුද්ධ බවද ඔහු එහිදී අවධාරණය කරනු ලැබුවා.
චීන ආර්ථිකය ශක්තිමත් මූලධර්ම හා ප්‍රබල දරා ගැනීමේ හැකියාවෙන් යුතු වන අතර බාහිර අභියෝගයන්ට මුහුණ දී තම ආර්ථික සංවර්ධන ඉලක්ක සපුරා ගැනීමේ විශ්වාසයෙන් හා හැකියාවෙන් ද පොහොසත් බවයි ඔහු පවසන්නේ.
එමෙන්ම බාහිර පරිසරයේ මතුවන වෙනස්කම්වලට ප්‍රතිචාර වශයෙන් චීනය වර්ධනීය ප්‍රතිපත්ති ක්‍රියාවට නංවනු ඇතැයි ද චීන ජාතික සංඛ්‍යාලේඛන කාර්යාංශයේ නියෝජ්‍ය අධ්‍යක්ෂ ෂෙන්ග් ලයි යුන් මහතා ප්‍රකාශ කළා.
