ජපානයේ පවතින රැකියා අවස්ථා ශ්‍රි ලංකාවට ලබාගැනීම සම්බන්ධයෙන් වූ විශේෂ සාකච්ඡාවක් විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතාගේ ප්‍රධානත්වයෙන් පසුගියදා කොළඹදී පැවැත්වුණා.
ඊට ජපාන ජාත්‍යත්නර මිනිස් බල සංවිධානය වන IM Japan ආයතනයේ සභාපති කනමොරි හිතොෂි මහතා (Mr. Kanamori Hitoshi) ඇතුළු නියෝජිතයින් එක්ව සිටි බව සඳහන්.
එහිදී අමාත්‍ය විජිත හේරත් මහතා ඉල්ලා සිටියේ, ජපානයේ පවතින රැකියා අවස්ථා සඳහා සුදුසුකම්ලත් ශ්‍රමිකයින් බඳවාගැනීම වැඩි කරන ලෙසයි.
ඉදිරියේ දී විශේෂයෙන් ජපානය ඇතුළු රටවල රැකියා සඳහා මෙරට ශ්‍රම බලකාය පුහුණු කිරීම සඳහා අදාළ අමාත්‍යාංශ හා රාජ්‍ය වෘත්තිය පුහුණු ආයතනවල සහාය ලබාගැනීම වඩාත් කාර්යක්ෂම කරන අතර, විදේශ කටයුතු, විදේශ රැකියා හා සංචාරක අමාත්‍යාංශය සමඟ ශ්‍රි ලංකා විදේශ සේවා නියුක්ති කාර්යාංශය සක්‍රිය දායකත්වයක් ලබාදෙන බව ද විජිත හේරත් මහතා IM Japan ආයතනයේ නියෝජිතයින් හමුවේ ප්‍රකාශ කළා.
එහිදී IM Japan ආයතනයේ සභාපතිවරයා කියා සිටියේ ජපානයේ රැකියා සඳහා බඳවාගන්නා වැඩපිළිවෙල යටතේ TITP, SSW කාණ්ඩවලට අයත් සාත්තු සේවක හා ඉදිකිරීම් රැකියා අවස්ථා රැසක් පවතින බවත්, ඒ සඳහා ශ්‍රි ලාංකික ශ්‍රමිකයින්ට වැඩි අවස්ථාවක් සලසා දෙන බවයි.
ඉදිරියේ දී රියදුරු ඇතුළු තවත් ක්‍ෂේත්‍ර රැසක රැකියා අවස්ථා ශ්‍රි ලාංකිකයින් වෙනුවෙන් විවෘත කිරීමට කටයුතු කරන බව ද ඒ මහතා සඳහන් කළා.
නිපුණතාවයෙන් සපිරි ශ්‍රි ලාංකික ශ්‍රමිකයින් බිහිකිරීමට ශ්‍රි ලංකා රජය ගන්නා උත්සාහය හිතොෂි මහතා මෙහිදී අගය කර සිටි බව කියයි.
ශ්‍රි ලාංකික විශ්ව විද්‍යාල සිසුන් සඳහා ජපානයේ TITP ඛාණ්ඩය යටතේ පුහුණු අවස්ථා ලබාදීම සම්බන්ධයෙන් ද මෙහිදී සාකච්ඡා කර තිබෙන බව සඳහන්.
