රජයේ සේවකයන් ලෙස කිසිදු දේශපාලන අතපෙවීමකට යටත් නොවී ස්වාධීනව වගකීම් ඉටු කරන ලෙස විද්‍යා හා තාක්ෂණ අමාත්‍ය මහාචාර්ය ක්‍රිෂාන්ත අබේසේන මහතා ඉල්ලා සිටිනවා.
රජය වැඩක් කිරීමට කවර හෝ බලපෑමක් නොකරන බවත්, ඒ නිසා කිසිදු බියකින් තොරව නිවැරදිව නිදහසේ ජනතා සේවාවන් සිදුකරන ලෙසත්, නිලධාරීන් වශයෙන් අප ඔබව ආරක්ෂා කරන බවත් විද්‍යා හා තාක්ෂණ අමාත්‍යවරයා පවසනවා.
විද්‍යා හා තාක්ෂණ අමාත්‍ය මහාචාර්ය ක්‍රිෂාන්ත අබේසේන මහතා මේ බව ප්‍රකාශ කළේ ඊයේ දින (11) වත්තල මාබෝල නගර සභාවේ කටයුතු සොයා බලා ඉදිරියට ක්‍රියාත්මක කරන ආකාරය පිළිබඳව නගර සභා නිලධාරීන් සමඟ සිදු කළ සාකච්ඡාකදීයි.
මෙහිදී වැඩිදුරටත් නගර සභා නිලධාරීන් ඇමතූ විද්‍යා හා තාක්ෂණ අමාත්‍ය මහාචාර්ය ක්‍රිෂාන්ත අබේසේන මහතා කියා සිටියේ මින් ඉදිරියට නිරතුරුව නගර සභාව තුළින් ජනතා සේවාවන් සිදුකරන ආකාරය පිළිබඳව සොයා බලන බවයි.
යම් රාජකාරියකට අදාළ නීතියක් වේ නම් ඒ නීතියට අනුවම එය සිදුකරන ලෙසත්, එමෙන්ම ඉදිරියේ දී ප්‍රාදේශීය සභාව, නගර සභාව මෙන්ම පළාත් සභාව ආදී ආයතන සමඟ අවශ්‍ය පරිදි ජනතාව සම්බන්ධ කිරීමට කටයුතු කරන බවත් අමාත්‍යවරයා මෙහිදී සඳහන් කළා.
ජනතාවත් සමඟම ඉදිරි ගමන යාමට රජය බලාපොත්තු වන බවයි අමාත්‍යවරයා මෙහිදී වැඩිදුරටත් පැවසුවේ.
