ළමුන් සහ ගැබිණි මවුව්වරුන් වෙළඳ ප්‍රචාරණය කටයුතු සඳහා යොදා ගැනීම තහනම් කිරීමට ගෙන ඇති තීරණය ජනවාරි මස 01වනදා සිට ක්‍රියාත්මක වනවා.
සෞඛ්‍ය අමාත්‍ය වෛද්‍ය නලින්ද ජයතිස්ස මහතා විසින් ඊට අදාළ ගැසට් නිවේදනය ඒ අනුව ඊයේ දින නිකුත් කිරීමටයි පියවර ගෙන ඇත්තේ.
1980 අංක 26 දරන ආහාර පනතට අදාළ 2023 වසරේ සංශෝධනය කළ, ආහාර ලේබල් කිරීමේ සහ ප්‍රචාරය කිරීමේ නියෝග ඇතුළු නියෝග කිහිපයක් එම නව ගැසට් නිවේදනයට අනුව නැවත සංශෝධනය වනවා.
ඉන් ප්‍රධාන කිහිපයක් පහත පරිදි වේ.
ආරම්භ ළදරු ආහාර වට්ටෝරු, පසුව ලබා දෙන ආහාර ළදරු ආහාර වට්ටෝරු, ළදරුවන් සඳහා ලබා දෙන ආහාර නිෂ්පාදන, කුඩා දරුවන් සඳහා වන කිරි සහ කිරි ආශ්‍රිත නිෂ්පාදන ගැන ප්‍රචාරණය තහනම්.
ආහාර ගැන සෘජුව හෝ වක්‍රව ගැබිණි මවක් හෝ කිරිදෙන මවක්, ළදරුවෙක් හෝ අවු.12 ට අඩු ළමයෙක් නියෝජනය වන ශ්‍රව්‍ය දෘශ්‍ය හෝ පින්තූර සහිත යම් ප්‍රචාරණයක්, නිෂ්පාදන ලේබලයක, මුද්‍රිත, ඉලෙක්ට්‍රොනික, සමාජ මාධ්‍ය හෝ වෙනයම් අයුරකින් ප්‍රචාරණය ද තහනම් වනවා.
අනුමැතියකින් තොරව, සෘජුව හෝ වක්‍රව අවු.12ට අඩු ළමුන් වෙත, යම් ආහාර අයිතම සමග හෝ වෙනම පත්‍රිකා, නොමිලේ දෙන සාම්පල, ද්‍රව්‍ය හෝ සෙල්ලම් බඩු, කාටූන් චරිත, වාසනාව ගෙන දෙන යම් වස්තූන්, ප්‍රසිද්ධ පුද්ගලයන් යොදාගනිමින් හෝ ආහාරයක් ප්‍රවර්ධනය කළ නොහැක.
