ප්‍රංශයට අයත් ‘මයෝට්’ දූපතේ ඇතිවූ චිඩෝ සුළි කුණාටුවෙන් පුද්ගලයින් සිය ගණනක් මියගොස් ඇති බව ජාත්‍යන්තර මාධ්‍ය වාර්තා කරනවා.
කෙසේ වෙතත් එම මාධ්‍ය වාර්තාවේම සඳහන් වන්නේ එය 1,000 කට ආසන්න විය හැකි බව මයෝට් ප්‍රාන්ත නායක ෆ්‍රැන්කොයිස්-සේවියර් බියුවිල් ප්‍රාදේශීය පුවත් සේවයට ප්‍රකාශ කර තිබෙන බවයි.
මෙම දූපත ආශ්‍රිත කලාපයට එල්ල වූ චිඩෝ සුළි කුණාටුව පැයට කිලෝමීටර් 225 (පැයට සැතපුම් 140) ට වඩා වැඩි සුළං වේගයකින් හමාගොස් තිබෙන බව සඳහන්.
එමගින් දූපතේ ජනාවාස සම්පූර්ණයෙන්ම විනාශ වී සමතල වී ඇති බවයි පවසන්නේ.
එහි තාවකාලික නිවාසවල ජිවත්වන බොහෝ දිළිඳු ජනතාවයි මින් දැඩි ලෙස පීඩාවට පත්ව ඇත්තේ.
මයෝට් දූපතේ ජනගහනය තුන්ලක්ෂ විසිපන්දහසක් පමණ වේ.
ඔවුන්ට මේ වන විට ආහාර, ජලය සහ ඖෂධ ඇතුළු අත්‍යවශ්‍ය ද්‍රව්‍ය හිඟවී ඇති අතර, බහුතර ජනතාව අවතැන් තත්ත්වයේ පසුවන බව සඳහන්.
කුණාටුව හේතුවෙන් කඩා වැටුණු විදුලි රැහැන් නිසා විදුලි සැපයුමද බොහෝ සෙයින් අඩාල වී ඇති අතර යටිතල පහසුකම්වලට පුළුල් ලෙස හානි සිදු වී ඇති නිසා ගමන් කළ නොහැකි මාර්ග ඇතුළුව හදිසි මෙහෙයුම්වලට දැඩි ලෙස බාධා එල්ල වී ඇති බවද මාධ්‍ය වාර්තා කරනවා.
