වයස අවුරුදු 10ක් තරම් කුඩා දරුවන්ටද වැඩිහිටි සිර දඬුවම් ලබා දීමට ඕස්ට්‍රේලියාවේ ක්වීන්ස්ලන්ඩ් ප්‍රාන්තය තීරණය කර තිබෙන බව විදෙස් මාධ්‍ය සඳහන් කරනවා.
ඊයේ (12) පාර්ලිමේන්තුව මෙම පනත සම්මත කර තිබුණා.
ඒ අනුව මිනීමැරුම්, බරපතල පහරදීම් වැනි අපරාධවලට වරදකරු වුවහොත් වැඩිහිටියන්ට සමාන දඬුවම්වලට එම වයස්වල පසුවන ළමයින්ටද යටත් වීමට සිදුවන පරිදි ඔස්ට්‍රේලියාවේ මෙම ප්‍රාන්තය මඟින් නීති සම්මත කර තිබෙනවා.
එහිදී එම වයස්වල පසුවන ළමයකු මිනීමැරුම් සම්බන්ධයෙන් වැරදිකරුවකු වුවහොත් ජීවිතාන්තය දක්වා සිරදඬුවම් ලබා දීමටයි තීරණය කර ඇත්තේ.
විදෙස් වාර්තා පෙන්වා දෙන්නේ තරුණ පිරිස් විසින් සිදු කරනු ලබන අපරාධ වැළැක්වීමක් ලෙස මෙවන් දැඩි දඬුවම් නියම කිරීමේ නීති ක්‍රියාත්මක කළ බවයි.
දැඩි දඩුවම් මගින් තරුණ අපචාර අඩු නොවන බවයි ඊට ප්‍රතිචාර වශයෙන් ඇතැම් පිරිස් අවධාරණය කර ඇත්තේ.
කෙසේ නමුත් එක්සත් ජාතීන්ගේ සංවිධානය ද මෙම නව ප්‍රතිසංස්කරණය විවේචනය කර ඇති බව සඳහන්.
ඒවා ළමා මානව හිමිකම් පිළිබඳ සම්මුතීන් නොසලකා හැර ඇති අතර ජාත්‍යන්තර නීතිය උල්ලංඝනය කර ඇති බව එම සංවිධානය පවසනවා.
මෙම නීති ප්‍රාන්තය පුරා අනාරක්ෂිත යැයි හැඟුණු සහ තරුණ අපරාධවලට ගොදුරු වූ සෑම ක්වීන්ස්ලන්ත වැසියෙකු සඳහාම වන බවයි ක්වීන්ස්ලන්ත අගමැති ඩේවිඩ් ක්‍රිසාෆුලි සඳහන් කර තිබුණේ.
