චීනයට අද (09) සිට 104% ක තීරු බදු පැනවෙන බවට ධවල මන්දිරය නිවේදනය කළ බව මාධ්‍ය ලේකම් කැරොලයින් ලෙවිට් අනාවරණය කර තිබෙනවා.
එය මෙරට වේලාවෙන් අද පෙරවරු 9.30 සිට එය බලාත්මක වනු ඇති.
ඒ අනුව චීනය ඇමරිකානු අපනයන සඳහා 34% ක තීරු බදු පැනවීමට පළිගැනීමක් ලෙසයි මෙම තීරණය ගෙන ඇත්තේ.
මේ අතර ධවල මන්දිරය පැවසුවේ ශ්‍රී ලංකාව ඇතුළු රටවල් 70 කට ආසන්න සංඛ්‍යාවක්, තීරු බදු සම්බන්ධයෙන් අමෙරිකාව සමග සාකච්ඡා කිරීමේ අපේක්ෂාවෙන් පසුවන බවයි.
එමෙන්ම වෙළෙද යුද්ධයක් හරහා කිසිවෙකුට ජයක් නොලැබෙන බව එක්සත් ජාතීන්ගේ මහලේකම් ඇන්ටෝනියෝ ගුටරෙස් සඳහන් කළා.
අමෙරිකාව චීනයට අවස්ථා දෙකකදී පැනවූ 54%ක තීරු බදුවලට එරෙහිව චීනයද අමෙරිකාවට 34%ක ප්‍රති තීරුබදු පැන වූ අතර ඊට විරෝධය පළ කළ අමෙරිකානු ජනපති ට්‍රම්ප් අනතුරු ඇඟවූයේ පැය 24ක් තුළ චීනය තීරුබදු ඉවත් කර නොගන්නේ නම් අමෙරිකාව චීනයට පනවන තීරුබදු 104% ක් දක්වා ඉහළ නංවන බවයි.
කෙසේ නමුත් චීනය එය ප්‍රතික්ෂේප කරනු ලැබුවා.
